Të dashur nxënës!
Viti shkollor 2019-2020 filloi normalisht si çdo vit tjetër, por COVID-19 krijoi një situatë të jashtëzakonshme që nuk e kishim imagjinuar ndonjëherë, ku izolimi në shtëpi ishte e vetmja zgjidhje për mbarë njerëzimin.
Të dashur nxënës Ju sot me sukses përfunduat vitin shkollor 2019-2020!
Kjo mbyllje shoqërohet vetëm me falenderime.
E nisëm bashkë me të gjithë mësimdhënësit që të falenderonim të gjithë nxënësit që sfiduat çdo vështirësi familjare, duke qenë prezent në mësim me çfarëdo lloj mënyre dhe pa kufij kohore, ditën dhe natën.
Ju ishit më korrekt me dërgimin e detyrave se sa në kohe normale dhe mezi prisnit të mernit vlerësimin nga mësimdhënësit që nuk u lodhën kurrë.
Të nderuar mësimdhënës dhe prindër!
Në mbylljen me sukses të këtij viti shkollor në kushtet e shtëpisë për shkak të COVID-19, falenderimet e përzemërta shkojnë për mësuesit dhe prindërit që u bënë një, për të mos lënë asnjë orë mësimi pa realizuar.
Mjekët ishin heronjtë në vijën e parë të zjarrit për të shpëtuar jetën e njerëzve, mësimdhënësit ishin heronjtë e heshtur që nuk e ndërprenë mësimin për asnjë çast nga shtëpia, duke tejkaluar çdo pritshmëri.
Të nderuar prindër!
Ju faleminderit për bashkëpunimin dhe përkushtimin maksimal ndaj fëmijëve tuaj në këtë periudhë të vështirë.
Ju sfiduat lodhjen megjithë ngarkesën familjare, punët dhe vështirësitë tjera.
Ju realizuat në mënyrë perfekte së bashku me fëmijët kompetencën dixhitale.
Ju treguat me se miri se shkolla jonë është djepi i arsimit.
Të nderuar kolegë!
Ju faleminderit për mirëkuptimin dhe gatishmërinë në komunikim me nxënësit, prindërit, drejtorinë, për sakrificën e jashtëzakonshme që bëtë për të përcjellë tek çdo nxënës me mënyrat më të çuditshme që as nuk i kishim menduar ndonjëherë, diturit më të domosdoshme në çdo lëndë mësimore.
Faleminderit që punuat me përkushtim dhe profesionalizëm duke përdorur çdo teknik të mundshme në mësimin online, pa marrë parasysh kufijtë kohore dhe hallet familjare.
Kaluam një periudhë të jashtëzakonshme, të vështirë por dolëm me sukses dhe me të fortë se kurrë për të ecur vetëm përpara.
Suksese të mëtutjeshme dhe kaloni ditë të bukura në pushimet verore!
Me respekt!
Nga drejtoria e shkollës
Drejtor: Lulieta Qerimi
